هند القاضى : يوم الحد !

عجوزة خواجاية
باعرف انه يوم الحد
لمابتظهر ف المكان
باين عليها الطريق
من عندنا لهنااااااااك واضح على وشها
ان العجوزة ف وقتها
كانت حكاية
وان العيون كانت بتلمع للحبيب زي المرايه
ف كل حد نفس الطقوس
.......
تدخل وتقعد وحدها
وبعد شوية
تطلب بيرة م الجرسون بصوت قلقان
... مرعوش كانه بيعتذر عن كونه حي لحد دلوقتي
يعدي الوقت وهي معصبة عينيها بجورنال اجنبي
وبين سطوره
......
النظرة تتنطط كتنطيط العيال على سلم البيت الكبير نهار جمعة
وبرغم ده .
.كانت ملامحها وهي بتقرا عادية .
. مابيضحكوش ..ولا يحزنوا لاخر طبعة م الاخبار
وسط العناوين الكبيرة و الصور كانت غريبة
جواها بيدور على عنوان قديم
مكتوب ف ورقة مكرمشة من ضمن اوراقها القديمة
ولما ماتلاقيش حاجة تونسها تساوي الصفحة فوق الصفحة بعناية وتطويهم على دنيا ماتعرفهاش وكالعادة تقوم تدفع حساب بيرة ما شربتهاش

هند القاضى