هند القاضى : (“ مونولوج “)

على اول الشارع
لقيتك جي
ومجرجر وراك ضلك
خطاك بتشيل ف التراب
وتبعتره ف كل اتجاه
شكلك مانمتش من زمن
وكل ماتقرب
بيظهر فوق دماغك طيف سحاب غامق
معقول تكون سكران ف عز الضهر
كئيب وتعملها
من اول الشارع
وانا
رصداك
خايف تصادفني
معقول لحد الوقت ده مانتش عارفني
وخايف
لسه
تحكيلي كلام متعاد
وايه يعني
مانت همومك كلها
عارفاها من بدري
مابيجدش عليهم شىء
وكل مايقدموا منك
تطلعهم
تنفض عنهم النسيان

وتنشرهم ف وش اليوم
وتتصرف كوحداني كلاسيكي
وتمشي المشية دي بالظبط
من اول الشارع
وانا شايفاك
ومستنية توصلي

وتحكيلي
وقبل ما تحكي
كالعادة
ح تطمن على ارضك
وتسألني بدون داعي
مش احنا صحاب؟

هند القاضى